မြောက်ကိုရီးယား၏ အကြီးဆုံး အလုပ်သမားအဖွဲ့အစည်းက ဖေဖော်ဝါရီလတွင် ကျင်းပသည့် ပါတီညီလာခံ၌ ချမှတ်ထားသော ၅ နှစ်ကြာ နိုင်ငံတော် စီးပွားရေးဖွံ့ဖြိုးတိုးတက်ရေး စီမံကိန်းကို အကောင်အထည်ဖော်နိုင်ရန် အလုပ်သမားများအနေဖြင့် “တစ်နိုင်ငံလုံး ချီတက်လှုပ်ရှားမှု” ကို ဆင်နွှဲကြရန် တိုက်တွန်းလိုက်ကြောင်း နိုင်ငံပိုင်မီဒီယာက ဗုဒ္ဓဟူးနေ့တွင် ဖော်ပြသည်။
အာဏာရ အလုပ်သမားပါတီ (Workers’ Party of Korea – WPK) နှင့် ဆက်နွှယ်နေသည့် ကိုရီးယား အလုပ်သမားသမဂ္ဂအထွေထွေအဖွဲ့ချုပ် (General Federation of Trade Unions of Korea) က တနင်္လာနေ့တွင် ကျင်းပသည့် အပြည့်အဝအစည်းအဝေးအတွင်း နိုင်ငံတစ်ဝန်းရှိ အဖွဲ့ဝင်များနှင့် အလုပ်သမားများထံ ယင်းတိုက်တွန်းချက်ကို ထုတ်ပြန်ခဲ့ကြောင်း ကိုရီးယားဗဟိုသတင်းဌာန (KCNA) က ဆိုသည်။
“နဝမအကြိမ်မြောက် ပါတီညီလာခံတွင် ဖော်ပြထားသည့် အောင်မြင်ရေး လမ်းကြောင်းနှင့်အညီ အသစ် ၅ နှစ်စီမံကိန်းကို ပြီးမြောက်အောင် ဆောင်ရွက်ရန် ပြည်သူအားလုံး ပါဝင်သည့် တစ်နိုင်ငံလုံး ချီတက်လှုပ်ရှားမှု စတင်နေပြီဖြစ်သည်” ဟု အဖွဲ့ချုပ်က ပြောကြားပြီး ဆိုရှယ်လစ် ဖွံ့ဖြိုးတိုးတက်ရေးကို တွန်းအားပေးနိုင်ရန် ပိုမိုရဲရင့်ပြီး ပိုမိုပြင်းထန်သည့် ကြိုးပမ်းမှုများ လိုအပ်ကြောင်း တိုက်တွန်းခဲ့သည်။
“ကျွန်ုပ်တို့၏ ကြီးမြတ်သော နိုင်ငံတော်ကို ထောက်တိုင်ဖြစ်စေသည့် အခြေခံအုတ်မြစ်များမှာ လုပ်ငန်းခွင်တိုင်းနှင့် တာဝန်ထမ်းဆောင်ရာတိုင်းပင် ဖြစ်သည်” ဟုလည်း အဆိုပါအဖွဲ့က ပြောကြားပြီး စက်မှုကဏ္ဍအသီးသီးကို တစ်ခုချင်းစီ ဖော်ပြကာ အလုပ်သမားများအနေဖြင့် စက်မှုထုတ်လုပ်မှု မြှင့်တင်ရေးနှင့် စံချိန်သစ်များ တင်နိုင်ရေးအတွက် ကြိုးပမ်းရန် တိုက်တွန်းခဲ့သည်။
ယင်းအလုပ်သမားအဖွဲ့အစည်းသည် WPK ၏ လမ်းညွှန်မှုအောက်ရှိ အဓိက အလုပ်သမားအဖွဲ့ ၄ ဖွဲ့အနက် တစ်ဖွဲ့ဖြစ်ပြီး လူထုအတွင်း ပါတီအယူဝါဒကို စိမ့်ဝင်ထည့်သွင်းရန် အဓိကရည်ရွယ်ထားကြောင်း သိရသည်။
KCNA ၏ ဖော်ပြချက်အရ တနင်္လာနေ့ အပြည့်အဝအစည်းအဝေးတွင် အဖွဲ့ချုပ်က မေလအတွင်း သက်တမ်းသစ်အစည်းအဝေးတစ်ရပ် ကျင်းပရန်လည်း ဆုံးဖြတ်ခဲ့ပြီး ယင်းမှာ ပါတီညီလာခံ ဆုံးဖြတ်ချက်များ အကောင်အထည်ဖော်ရေးကို အသစ်တဖန် တက်ကြွစေရန် ကြိုးပမ်းမှု၏ တစ်စိတ်တစ်ပိုင်းအဖြစ် ခေါင်းဆောင်မှုအသစ်ကို စတင်ဖွဲ့စည်းနိုင်ဖွယ်ရှိကြောင်း သတင်းက ဆိုသည်။