ဘယ်လာရုစ်သမ္မတ အလက်ဇန်ဒါ လူကာရှန်ကိုနှင့် မြောက်ကိုရီးယားခေါင်းဆောင် ကင်ဂျုံအွန်တို့သည် ကြာသပတေးနေ့က ပြုံယမ်းတွင် တွေ့ဆုံဆွေးနွေးပြီး ချစ်ကြည်ရေးနှင့် ပူးပေါင်းဆောင်ရွက်ရေး စာချုပ်တစ်ရပ်ကို လက်မှတ်ရေးထိုးခဲ့ကြသည်။ နှစ်နိုင်ငံဆက်ဆံရေးသည် “အဆင့်သစ်” သို့ ရောက်ရှိနေပြီဖြစ်ကြောင်း လူကာရှန်ကိုက ပြောကြားခဲ့သည်။
နှစ်ရက်ကြာ တရားဝင်ခရီးစဉ်အဖြစ် ပြုံယမ်းသို့ ရောက်ရှိနေသည့် လူကာရှန်ကိုက အဆိုပါစာချုပ်ကို “အခြေခံကျသော” စာချုပ်ဟု ချီးကျူးခဲ့ပြီး ပညာရေး၊ ကျန်းမာရေးနှင့် စိုက်ပျိုးရေးအပါအဝင် နယ်ပယ်အသီးသီးတွင် ပူးပေါင်းဆောင်ရွက်ရန် သဘောတူစာချုပ်များနှင့် နားလည်မှုစာချွန်လွှာများကိုလည်း နှစ်ဖက်အရာရှိများက ထပ်မံ လက်မှတ်ရေးထိုးခဲ့ကြသည်။
လူကာရှန်ကိုက “ကမ္ဘာ့အင်အားကြီးနိုင်ငံများက နိုင်ငံတကာဥပဒေကို မျက်ကွယ်ပြု၍ ချိုးဖောက်နေသည့် ယနေ့အခြေအနေတွင် လွတ်လပ်သည့်နိုင်ငံများအနေဖြင့် အချုပ်အခြာအာဏာကို ကာကွယ်ရန်နှင့် ပြည်သူများ၏ လူမှုဘဝ တိုးတက်ရေးအတွက် ပိုမိုနီးကပ်စွာ ပူးပေါင်းဆောင်ရွက်ရန် လိုအပ်သည်” ဟု ပြောကြားခဲ့သည်။ ၎င်း၏ ပြောရေးဆိုခွင့်ရှိသူရုံးကလည်း ကင်ဂျုံအွန်သည် ဘယ်လာရုစ်အပေါ် “သဘောတူညီမှုနှင့် အပြည့်အဝ ထောက်ခံမှု” ကို ဖော်ပြခဲ့ပြီး အနောက်နိုင်ငံများ၏ “တရားမဝင် ဖိအားပေးမှု” ကို ဆန့်ကျင်ကြောင်း ပြောကြားခဲ့သည်ဟု ထုတ်ပြန်ခဲ့သည်။
ခေါင်းဆောင်နှစ်ဦးသည် ကင်ဂျုံအွန်က ဧည့်ခံသည့် တရားဝင် ဧည့်ခံပွဲနှင့် ဖျော်ဖြေပွဲသို့လည်း အတူတက်ရောက်ခဲ့ကြသည်။ ထို့အပြင် လက်ဆောင်များကိုလည်း အပြန်အလှန် ပေးအပ်ခဲ့ကြရာ ကင်က လူကာရှန်ကိုအား ဓားတစ်လက်နှင့် ဘယ်လာရုစ်ခေါင်းဆောင်၏ ပုံရိပ်ပါသော အကြီးစား ပန်းအိုးတစ်လုံး ပေးအပ်ခဲ့သည်။ လူကာရှန်ကိုကမူ ဘယ်လာရုစ်ထုတ် ချေမှုန်းရေးသေနတ်တစ်လက် အပါအဝင် လက်ဆောင်များ ပေးအပ်ခဲ့ပြီး “ရန်သူတွေ ပေါ်လာရင် သုံးဖို့ပေါ့” ဟု ပြောကြားခဲ့သည်။
ဘယ်လာရုစ်သည် ရုရှား၏ နီးကပ်သော မဟာမိတ်နိုင်ငံတစ်နိုင်ငံဖြစ်ပြီး လူကာရှန်ကိုက ၂၀၂၂ ခုနှစ် ဖေဖော်ဝါရီတွင် ရုရှား၏ ယူကရိန်းအပြည့်အဝ ကျူးကျော်စစ်အတွက် ဘယ်လာရုစ်ပိုင်နက်ကို စတင်စခန်းအဖြစ် အသုံးပြုခွင့်ပေးခဲ့သည်။ ထို့နောက် ရုရှား၏ တာကတစ်နျူကလီးယား လက်နက်များကို ဘယ်လာရုစ်တွင် တပ်ဖြန့်ချထားရန်လည်း ခွင့်ပြုခဲ့သည်။ အခြားတစ်ဖက်တွင် ကင်ဂျုံအွန်သည်လည်း မကြာသေးသည့်နှစ်များအတွင်း မော်စကိုဘက်သို့ နိုင်ငံခြားရေးမူဝါဒကို ဦးတည်ခဲ့ပြီး ရုရှားသမ္မတ ဗလာဒီမာ ပူတင်၏ ယူကရိန်းစစ်ပွဲကို ထောက်ခံရန် တပ်ဖွဲ့ဝင် ထောင်နှင့်ချီနှင့် လက်နက်အများအပြား ပေးပို့ခဲ့ကြောင်း သိရသည်။ လူကာရှန်ကိုနှင့် ကင်ဂျုံအွန်တို့သည် နောက်ဆုံးအကြိမ်အဖြစ် ၂၀၂၅ ခုနှစ် စက်တင်ဘာလတွင် ဘေဂျင်းမြို့၌ တွေ့ဆုံခဲ့ကြသည်။