ပီရူးနိုင်ငံ လီမာမြို့ရှိ Alejandro Villanueva အားကစားကွင်းတွင် သောကြာညက ဖြစ်ပွားခဲ့သည့် သေချာမသိရသေးသော “ဖြစ်ရပ်” တစ်ခုအတွင်း အနည်းဆုံး ၁ ဦး သေဆုံးပြီး ၄၇ ဦး ဒဏ်ရာရရှိခဲ့ကြောင်း ကျန်းမာရေးဝန်ကြီးဌာနက ပြောကြားသည်။
ကျန်းမာရေးဝန်ကြီး Juan Carlos Velasco က ဖြစ်ရပ်၏ အကြောင်းရင်းကို ထုတ်ဖော်ပြောကြားခြင်းမရှိဘဲ “အားကစားကွင်းအတွင်း မတော်တဆဖြစ်ရပ်တစ်ခုကြောင့် ၄၇ ဦး ဒဏ်ရာရရှိခဲ့ပြီး ဝမ်းနည်းစွာ ၁ ဦး အသက်ဆုံးရှုံးခဲ့သည်” ဟု မီဒီယာများသို့ ပြောကြားခဲ့သည်။ အစောပိုင်းတွင် အားကစားကွင်းနံရံ တစ်စိတ်တစ်ပိုင်း ပြိုကျခဲ့သည်ဟု သတ်မှတ်ခဲ့သော်လည်း Alianza Lima အသင်းက X ပေါ်တွင် ထုတ်ပြန်ရာ၌ “နံရံပြိုကျမှု သို့မဟုတ် အားကစားကွင်း၏ ဖွဲ့စည်းပုံ ချို့ယွင်းမှုကြောင့် မဟုတ်” ဟု ဆိုသည်။ Velasco ၏ ပြောကြားချက်အရ ဒဏ်ရာရရှိသူ ၃၉ ဦးကို လီမာဒေသရှိ ဆေးရုံများသို့ ပို့ဆောင်ခဲ့ပြီး ၃ ဦးမှာ အခြေအနေ စိုးရိမ်ဖွယ်ရှိသည်။
မီးသတ်ဦးစီးမှူး Marcos Pajuelo ကလည်း တောင်ဘက်တန်းစင်၏ ဖွဲ့စည်းပုံမှာ ကောင်းမွန်နေဆဲဟု ထင်ရကြောင်း၊ ပြိုကျသွားသည့် နံရံ သို့မဟုတ် ကွင်းအတွင်း ပြုတ်ကျသွားသည့် အစိတ်အပိုင်းတစ်ခုမျှ မတွေ့ရကြောင်း သတင်းထောက်များကို ပြောကြားသည်။ ထို့အပြင် ပီရူးဘောလုံးလိဂ်ကလည်း Alianza Lima နှင့် Club Universitario de Deportes တို့၏ ပွဲစဉ်ကို စနေနေ့ညတွင် မူလအစီအစဉ်အတိုင်း ဆက်လက်ကျင်းပမည်ဟု ထုတ်ပြန်ကြေညာထားသည်။