အမေရိကန်သမ္မတ ဒေါ်နယ်လ် ထရမ့်က အရှေ့အလယ်ပိုင်း စစ်ပွဲ မကြာမီ အဆုံးသတ်နိုင်ကြောင်း အရိပ်အမြွက် ပြောကြားခဲ့ပြီးနောက် ဗုဒ္ဓဟူးနေ့တွင် အမေရိကန်ဒေါ်လာနှင့် နှိုင်းယှဉ်လျှင် ကိုရီးယားဝမ်တန်ဖိုး သိသိသာသာ ပြန်လည်မြင့်တက်လာခဲ့သည်။ ယင်းသည် ယခင်နေ့က ပြင်းထန်စွာ ကျဆင်းခဲ့မှုမှ ပြန်လည်တက်လာခြင်းလည်း ဖြစ်သည်။
ဗုဒ္ဓဟူးနေ့ နံနက်ပိုင်း ဈေးဖွင့်ချိန်တွင် ဝမ်သည် အမေရိကန်ဒေါ်လာတစ်ဒေါ်လာလျှင် 1,508.5 ဝမ်ဖြင့် အရောင်းအဝယ် စတင်ခဲ့ပြီး ယခင်နေ့ ပိတ်ဈေး 1,530.1 ဝမ်ထက် 21.6 ဝမ် မြင့်တက်ခဲ့သည်။ အင်္ဂါနေ့တွင် မှတ်တမ်းတင်ခဲ့သော အဆင့်သည် 2009 ခုနှစ် မတ်လ 9 ရက်က ကမ္ဘာလုံးဆိုင်ရာ ဘဏ္ဍာရေးအကျပ်အတည်းကာလအတွင်း 1,549 ဝမ်ဖြင့် ပိတ်ခဲ့ပြီးနောက် အနိမ့်ဆုံးအဆင့် ဖြစ်ခဲ့သည်။
ပဋိပက္ခ ဆက်လက်ကြာရှည်နေသည့်အခြေအနေတွင် ထရမ့်က အင်္ဂါနေ့ အမေရိကန်စံတော်ချိန်အရ အီရန်မှ အမေရိကန်တပ်ဖွဲ့များကို “၂ ပတ် သို့မဟုတ် ၃ ပတ်အတွင်း” ပြန်လည်ရုပ်သိမ်းမည်ဟု မျှော်လင့်ကြောင်း ပြောကြားခဲ့သည်။ “ကျွန်တော် အီရန်ကနေ ထွက်သွားရုံပဲလိုတယ်၊ မကြာခင် အဲဒီလို လုပ်သွားမယ်၊ ပြီးရင် သူတို့ ပြိုလဲသွားမယ်” ဟုလည်း ထပ်လောင်းပြောကြားခဲ့သည်။
နိုင်ငံတကာမီဒီယာများ၏ ဖော်ပြချက်အရ အီရန်သမ္မတ မာဆုပ်ဒ် ပေဇက်ရှ်ကီးယန်းက ဥရောပကောင်စီဥက္ကဋ္ဌ အန်တိုနီယို ကိုစတာအား ပြောကြားရာတွင် တိုက်ပွဲများ ပြန်လည်မဖြစ်ပွားစေရန် အာမခံနိုင်ပါက တီဟီရန်အနေဖြင့် စစ်ပွဲ အဆုံးသတ်ရန် “လိုအပ်သည့် ဆန္ဒ” ရှိကြောင်း ဆိုခဲ့သည်။
ညပိုင်းတွင် အမေရိကန်ဒေါ်လာ အညွှန်းကိန်းသည် အဓိကငွေကြေး ၆ မျိုးနှင့် နှိုင်းယှဉ်တိုင်းတာမှုအရ 100 အောက်သို့ ကျဆင်းသွားခဲ့သည်။ အမေရိကန် စတော့ဈေးကွက်များလည်း ရင်းနှီးမြှုပ်နှံသူများက နောက်ဆုံးဖြစ်ပေါ်လာသည့် အခြေအနေများကို ကြိုဆိုခဲ့သဖြင့် အပြင်းအထန် မြင့်တက်ခဲ့သည်။
ဗုဒ္ဓဟူးနေ့ ပထမ ၁၅ မိနစ်အတွင်း ကိုရီးယားစတော့ဈေးကွက် အခြေခံညွှန်းကိန်း KOSPI သည် 4.88% မြင့်တက်ပြီး 5,299.02 မှတ်သို့ ရောက်ရှိခဲ့သည်။
လွန်ခဲ့သည့်လအကုန်က စတင်ခဲ့သော အမေရိကန်-အစ္စရေး၏ အီရန်အပေါ် တိုက်ခိုက်မှုများသည် ဒေသတွင်း ပဋိပက္ခအဖြစ် ပိုမိုတင်းမာလာပြီး ကမ္ဘာလုံးဆိုင်ရာ ရေနံဈေးနှုန်းများ မြင့်တက်စေသကဲ့သို့ ငွေကြေးဖောင်းပွမှုနှင့် စီးပွားရေးနှေးကွေးနိုင်ခြေအပေါ်လည်း စိုးရိမ်မှုများ တိုးပွားစေခဲ့သည်။ ထို့ကြောင့် ပြည်တွင်းနှင့် နိုင်ငံတကာ နိုင်ငံခြားငွေလဲလှယ်ရေးနှင့် စတော့ဈေးကွက်များတွင် မတည်ငြိမ်မှု မြင့်မားနေကြောင်း သိရသည်။