အမေရိကန်သမ္မတ ဒေါ်နယ်လ် ထရမ့်သည် အီရန်နှင့်ဆိုင်သော စစ်ရေးအခြေအနေကို ပြည်သူများအား ရှင်းလင်းတင်ပြရန် ဗုဒ္ဓဟူးည prime-time အချိန်တွင် အထူးမိန့်ခွန်း ပြောကြားမည်ဟု အိမ်ဖြူတော်က ပြောကြားသည်။ ထရမ့်ကလည်း အမေရိကန်အနေဖြင့် ယခုတိုက်ပွဲကို “နှစ်ပတ်အတွင်း ဒါမှမဟုတ် ရက်အနည်းငယ် ပို” အတွင်း အဆုံးသတ်နိုင်မည်ဟု ခန့်မှန်းခဲ့သည်။
ဝါရှင်တန်မြို့တွင် မတ် ၃၁ ရက် အင်္ဂါနေ့က သတင်းထောက်များနှင့် တွေ့ဆုံစဉ် ထရမ့်က “ကျွန်တော့်ရဲ့ ရည်မှန်းချက်တစ်ခုတည်းက ၎င်းတို့မှာ နျူကလီးယားလက်နက် မရှိစေရန်” ဟု ပြောပြီး “အဲဒီရည်မှန်းချက် ပြည့်မီပြီးသား” ဟု ဆိုခဲ့သည်။ သို့သော် ထိုရည်မှန်းချက် မည်သို့ ပြည့်မီခဲ့သည်ကိုမူ ရှင်းလင်းပြောကြားခြင်း မရှိခဲ့ပေ။ အီရန်နှင့် ရက်အနည်းငယ်အတွင်း သဘောတူညီချက် ရနိုင်သည်ဟုလည်း ပြောခဲ့ပြီး မရပါက “တံတားတချို့ကို ထိခိုက်အောင် လုပ်မယ်၊ ကျွန်တော်တို့ စဉ်းစားထားတဲ့ လှပတဲ့ တံတားတချို့ ရှိတယ်” ဟု ခြိမ်းခြောက်သလို ပြောဆိုခဲ့သည်။ ထို့ပြင် ဟော်မုဇ်ရေလက်ကြားကို ဖွင့်ထားနိုင်ရန် တာဝန်မှာ ၎င်းကို အားထားနေရသော နိုင်ငံများ၏ တာဝန်သာ ဖြစ်သင့်ကြောင်း၊ အမေရိကန်အနေဖြင့် “ဒီအလုပ်ကို လုပ်စရာ အကြောင်းမရှိ” ဟုလည်း ဆိုသည်။
အင်္ဂါနေ့အစောပိုင်းတွင်လည်း ထရမ့်က အီရန်စစ်ရေးကြိုးပမ်းမှုကို ပိုမိုကူညီပေးရန် မလိုလားသည့် မဟာမိတ်နိုင်ငံများအပေါ် မကျေနပ်မှုကို ထုတ်ဖော်ခဲ့ပြီး “ကိုယ့်ဆီက ရေနံကို ကိုယ့်ဘာသာ ယူကြ” ဟု ပြောဆိုခဲ့သည်။ တချိန်တည်းမှာပင် ၎င်းသည် အီရန်နှင့် သံတမန်ရေးအရ တိုးတက်မှုရှိနေကြောင်း အခိုင်အမာ ပြောဆိုခြင်းနှင့် စစ်ပွဲကို ပိုမိုချဲ့ထွင်မည်ဟု ခြိမ်းခြောက်ခြင်းတို့ကြား အကြိမ်ကြိမ် လှည့်လည်ပြောဆိုနေခဲ့သည်။
အီရန်စစ်ပွဲကြောင့် ကမ္ဘာတစ်ဝန်း လောင်စာဈေးနှုန်းများ ဆက်လက်မြင့်တက်နေချိန်တွင် အမေရိကန် ဓာတ်ဆီဈေးနှုန်းသည် အင်္ဂါနေ့က တစ်ဂါလန်လျှင် ပျမ်းမျှ ၄ ဒေါ်လာကို ၂၀၂၂ ခုနှစ်နောက်ပိုင်း ပထမဆုံးအကြိမ် ကျော်လွန်ခဲ့သည်။ လေ့လာသူများက လောင်စာဈေးမြင့်မားမှုကြောင့် သယ်ယူပို့ဆောင်ရေးနှင့် ထုပ်ပိုးစရိတ်များ တက်လာပြီး နောက်ဆုံးတွင် စားသောက်ကုန်ဈေးနှုန်းများထံပါ သက်ရောက်လာမည်ဟု သုံးသပ်ထားသည်။
အစ္စရေးနှင့် အမေရိကန်တို့က အီရန်ကို ထပ်မံတိုက်ခိုက်မှု လှိုင်းသစ်တစ်ရပ် စတင်ခဲ့ရာ အင်္ဂါနေ့အစောပိုင်းတွင် တဟီရန်မြို့ကို ထိမှန်ခဲ့သည်။ အီရန်က စစ်ပွဲအစပိုင်းကလောက် မစ်ဇိုင်းဒုံးများကို မပစ်ခတ်တော့သော်လည်း ပစ်ဖျက်ရန် ပိုမိုခက်ခဲသော မြေမျက်နှာပြင်နိမ့် ပျံသန်းသည့် ဒရုန်းများကို ပိုမိုအသုံးပြုလာနေသည်။ ဤပဋိပက္ခကြောင့် ဒေသတွင်း လူပေါင်း ၃,၀၀၀ ကျော် သေဆုံးခဲ့ပြီး လက်ဘနွန်နှင့် အီရန်တို့တွင် သန်းနှင့်ချီ နေရပ်စွန့်ခွာနေရသည်။
အီရတ်နိုင်ငံတွင်လည်း အမေရိကန်သတင်းထောက် အမျိုးသမီးတစ်ဦး ပြန်ပေးဆွဲခံထားရကြောင်း အဆိုပါနိုင်ငံမှ အရာရှိ ၂ ဦးက အင်္ဂါနေ့တွင် ပြောကြားသည်။ ထိုပြန်ပေးဆွဲမှုသည် စစ်ပွဲနှင့် ဆက်နွယ်မှုရှိမရှိကိုမူ မသိရသေးကြောင်း ၎င်းတို့က ဆိုသည်။