တိုကျိုတွင် အိုမင်းနေသော ချယ်ရီပင်များ ပြိုလဲလာသဖြင့် ပန်းကြည့်ရာသီ၌ လုံခြုံရေးစိုးရိမ်မှု မြင့်တက်

တိုကျိုမြို့ရှိ အသက်အရွယ်ရင့်နေပြီဖြစ်သည့် Somei Yoshino ချယ်ရီပင်အချို့ ပြိုလဲလာခြင်းကြောင့် ပန်းကြည့်ရာသီအတွင်း လုံခြုံရေးနှင့်ပတ်သက်သည့် စိုးရိမ်မှုများ မြင့်တက်လာနေသည်။ မကြာသေးမီရက်ပိုင်းအတွင်း ချယ်ရီပင်နှစ်ပင် ပြိုလဲခဲ့သော်လည်း ထိခိုက်ဒဏ်ရာရသူ မရှိခဲ့ကြောင်း သိရပြီး အာဏာပိုင်များက သစ်ပင်အဟောင်းများ၏ အခြေအနေကို တင်းတင်းကျပ်ကျပ် စစ်ဆေးနေသည်။

AP သတင်းအရ တိုကျိုရှိ လူကြိုက်များသည့် ချယ်ရီပင်အများစုသည် ဂျပန်နိုင်ငံ စစ်ပြီးခေတ် ၁၉၆၀ ပြည့်နှစ်များအတွင်း စိုက်ပျိုးခဲ့ခြင်းဖြစ်ပြီး ယခုအခါ အိုမင်းလာကာ ခိုင်ခံ့မှု လျော့နည်းနေပြီဖြစ်သည်။ ကြာသပတေးနေ့တွင် တိုကျိုမြို့လယ်ရှိ Kinuta Park နှင့် Chidorigafuchi greenway တို့တွင် ချယ်ရီပင် ၂ ပင် ပြိုလဲခဲ့ရာ Kinuta Park မှ သစ်ပင်တစ်ပင်က ခြံစည်းရိုးကို ထိခိုက်စေခဲ့ပြီး အခြားသစ်ပင်တစ်ပင်မှာ အင်ပါယာနန်းတော်ရေကန်ဘက်သို့ လဲကျလုနီးပါး ဖြစ်ခဲ့သော်လည်း မည်သူမျှ ထိခိုက်ဒဏ်ရာ မရရှိခဲ့ပါ။

Kinuta Park တွင် ပြိုလဲခဲ့သည့် သစ်ပင်သည် အမြင့် ၁၈ မီတာ၊ အချင်း ၂.၅ မီတာ ရှိပြီး အဖိုးအိုဆုံးသစ်ပင်များထဲမှ တစ်ပင်ဖြစ်ကာ အသက် ၆၀ ကျော်ရှိနိုင်ကြောင်း တာဝန်ရှိသူများက ပြောသည်။ မတ်လအတွင်း အဆိုပါပန်းခြံ၌ ချယ်ရီပင်အိုတစ်ပင် ထပ်မံပြိုလဲခဲ့ပြီး လမ်းသွားလမ်းလာ တစ်ဦး ထိခိုက်ဒဏ်ရာရခဲ့သည်။ Tokyo Metropolitan အစိုးရ၏ ပြည်သူ့ပန်းခြံတာဝန်ခံ Masakazu Noguchi ကလည်း ယမန်နှစ်အတွင်း တိုကျိုပန်းခြံများ၌ သစ်ပင် ၈၅ ပင် ပြိုလဲခဲ့ရာ အများစုမှာ ချယ်ရီပင်များဖြစ်ပြီး လူ ၃ ဦး ထိခိုက်ဒဏ်ရာရခဲ့ကြောင်း ပြောသည်။

ချယ်ရီပန်းကြည့်ရာသီဖြစ်သည့် “hanami” တွင် လူများသည် သစ်ပင်များအောက်၌ စုဝေးလေ့ရှိသဖြင့် သစ်ပင်ပြိုလဲမှုများက တိုကျိုအာဏာပိုင်များကို ပိုမိုသတိကြီးစေခဲ့သည်။ Tokyo Assembly အဖွဲ့ဝင် Yutaka Kazama ကလည်း မနှစ်က လူမှုကွန်ရက်ပေါ်တွင် Kinuta Park ရှိ အမြစ်အချို့ ပေါ်ထွက်နေခြင်း သို့မဟုတ် ပုပ်ပျက်နေခြင်းတို့ကြောင့် ချယ်ရီပင်များ အန္တရာယ်ရှိနိုင်သည်ဟု ထောက်ပြခဲ့ပြီး ခိုင်မာသည့် လုံခြုံရေးအစီအမံများ လိုအပ်ကြောင်း ပြောဆိုခဲ့သော်လည်း သစ်ပင်များကို ချက်ချင်းခုတ်လှဲသင့်သည်ဟု မဆိုခဲ့ပါ။

သစ်ပင်များ အိုမင်းလာခြင်းနှင့် အတွင်းပိုင်း၌ မှိုပေါက်ရောက်ပျက်စီးမှုများသည် ချယ်ရီပင်များ ဆုတ်ယုတ်လာရခြင်း၏ အဓိကအကြောင်းရင်းများဖြစ်ကြောင်း သိရသည်။ သစ်ပင်ဆရာဝန် Hiroyuki Wada က သစ်ပင်တစ်ပင် အန္တရာယ်ရှိမရှိ သတိထားစစ်ဆေးနိုင်ရန် ခေါင်မိုးလို ငိုက်စောင်းနေခြင်း၊ အပေါက်များရှိခြင်း သို့မဟုတ် အောက်ခြေတွင် မှိုပွင့်ထွက်လာခြင်းတို့ကို စောင့်ကြည့်ရန် လိုကြောင်း ပြောသည်။ မိုးရွာပြီးနောက် သစ်ပင်ရိုးတံအတွင်း ရေကျန်နေပါကလည်း အန္တရာယ် ပိုမိုမြင့်တက်နိုင်သည်ဟု ၎င်းက ဆိုသည်။ “နေ့စဉ်ဘဝမှာ တွေ့ရတဲ့ သစ်ပင်အများစုဟာ စစ်ပြီးမကြာသေးခင်က စိုက်ထားတာကြောင့် ယခုဆိုရင် အသက် ၇၀ ကနေ ၈၀ ဝန်းကျင်အထိ ရောက်လာပြီး ပိုမိုအားနည်းလာနေပါပြီ” ဟု Wada က ပြောကြားပြီး နွေရာသီအပူလွန်ကဲမှုနှင့် ရှည်လျားသည့် ခြောက်သွေ့ရာသီများ၏ သက်ရောက်မှုလည်း ရှိကြောင်း ထည့်သွင်းပြောဆိုသည်။

မတ်လဖြစ်ရပ်များအပြီး တိုကျိုရှိ အဓိကပန်းခြံများတွင် ပန်းကြည့်ရာသီမတိုင်မီ သစ်ပင်ကျန်းမာရေး စစ်ဆေးမှုများ ပြုလုပ်ခဲ့သည်။ Kinuta Park တွင် ချယ်ရီပင် ၈၀၀ ကျော်ကို ကနဦးစစ်ဆေးခဲ့ပြီး သစ်ပင်အချို့ကို ခုတ်လှဲကာ အခြားအချို့အနီးတွင် သတိပေးဆိုင်းဘုတ်များ တပ်ဆင်ခဲ့သော်လည်း ကြာသပတေးနေ့တွင် ပြိုလဲသည့် သစ်ပင်၌ သတိပေးဆိုင်းဘုတ် မရှိခဲ့ကြောင်း သိရသည်။ Noguchi က “အခု ကျွန်တော်တို့ လုပ်ဆောင်နေတဲ့ အစီအမံတွေဟာ အများအားဖြင့် ယာယီအဆင့်သာ ဖြစ်ပြီး ပြန်လည်စိုက်ပျိုးရေးလို အခြေခံနည်းလမ်းတွေ မဟုတ်သေးပါဘူး။ စစ်ဆေးပြီးပြီဆိုတာနဲ့ လုံးဝလုံခြုံတယ်လို့ မပြောနိုင်တာကြောင့် လာရောက်သူတွေ သတိထားကြပါ” ဟု ပြောသည်။

တိုကျိုရှိ လူကြိုက်များသည့် ပန်းကြည့်နေရာတစ်ခုဖြစ်သော Inokashira Park တွင်လည်း အန္တရာယ်ကင်းရေးနှင့် သစ်ပင်ပြန်လည်ဖွံ့ဖြိုးရေး အစီအမံအဖြစ် မကြာသေးမီနှစ်များအတွင်း အိုမင်းနေသည့် ချယ်ရီပင်များနှင့် ၎င်းတို့၏ အကိုင်းအခက်များကို ဒေသအာဏာပိုင်များက ခုတ်လှဲခဲ့သည်။ တစ်ချိန်က ပန်းရောင်ပန်းများဖြင့် ရေကန်ပတ်လည်ကို ဖုံးလွှမ်းနေခဲ့သည့် မြင်ကွင်းကွက်လပ်များ ပေါ်လာသည့်အပေါ် လူမှုကွန်ရက်တွင် စိတ်မကောင်းကြောင်း ပြောဆိုမှုများလည်း ရှိခဲ့သည်။ Wada က ချယ်ရီပန်းနှင့် ရှုခင်းကို ထိန်းသိမ်းထားနိုင်ရန် ထိရောက်သည့် ပြန်လည်ဖွံ့ဖြိုးရေးအစီအစဉ်က အဓိကကျကြောင်း ပြောသည်။

ပန်းကြည့်လာရောက်သူများက သစ်ပင်ပြိုလဲမှုသတင်းများအပေါ် စိုးရိမ်နေကြသော်လည်း ခဏတာသာ ပွင့်လန်းသည့် နူးညံ့သိမ်မွေ့သော ပန်းရောင်ပန်းများကို မလွတ်ချင်ကြောင်း ပြောဆိုနေကြသည်။ “နည်းနည်းတော့ စိုးရိမ်မိပါတယ်။ ဒါပေမဲ့ သစ်ပင်ရိုးတံနားကနေ ဝေးဝေးနေမယ်ဆိုရင် အဆင်ပြေမယ်ထင်ပါတယ်” ဟု Lisa Suzuki က ပြောသည်။ နောက်ထပ်လာရောက်သူ Akira Kamiyashiki ကလည်း တနင်္ဂနွေနေ့တွင် မိုးရွာမည်ဟု ခန့်မှန်းထားသဖြင့် သမီးနှင့်အတူ မဖြစ်မနေ လာရောက်ခဲ့ကြောင်း ပြောပြီး “မဝင်ရနယ်မြေဆိုင်းဘုတ်တွေကို မြင်ရတော့ အခုတော့ လုံခြုံတယ်လို့ ခံစားရပါတယ်” ဟု ဆိုသည်။

ဂျပန်နိုင်ငံ၏ အကြိုက်ဆုံးပန်းဖြစ်သည့် “sakura” ချယ်ရီပန်းများသည် ပုံမှန်အားဖြင့် မတ်လကုန်မှ ဧပြီလအစောပိုင်းအထိ အပြည့်အဝ ပွင့်လန်းကြပြီး အစိုးရသစ်နှစ်၊ ကျောင်းသစ်နှစ်နှင့် စီးပွားရေးနှစ်သစ် စတင်ချိန်နှင့်လည်း တိုက်ဆိုင်နေသည်။ ဂျပန်လူထုအများအပြားသည် ချယ်ရီပင်များအောက်တွင် လမ်းလျှောက်ခြင်း သို့မဟုတ် ပျော်ပျော်ပါးပါး စားသောက်ပွဲများ ပြုလုပ်ခြင်းကို နှစ်သက်ကြသည်။