ဆမ်ဆောင်း အီလက်ထရောနစ်ရှိ သမဂ္ဂဝင် ဝန်ထမ်းများသည် စီမံခန့်ခွဲမှုနှင့် လုပ်ခလစာဆိုင်ရာ ဆွေးနွေးမှုများကို ပြန်လည်စတင်ပြီး ၃ ရက်အကြာတွင်ပင် ရပ်ဆိုင်းလိုက်သဖြင့် မေလအတွင်း သပိတ်မှောက်မှု ဖြစ်ပေါ်လာနိုင်ခြေ မြင့်တက်လာခဲ့သည်။
ဆမ်ဆောင်းဂရုပ် ပေါင်းစည်းသမဂ္ဂ (SGUU) လက်အောက်ရှိ ဆမ်ဆောင်း အီလက်ထရောနစ် အဖွဲ့ခွဲကို ဦးဆောင်နေသူ ချွိုင် ဆွန်းဟိုက “စီမံခန့်ခွဲမှုဘက်တွင် ရိုးသားမှု မရှိကြောင်း” ပြောကြားကာ ဆွေးနွေးမှုများကို ရပ်ဆိုင်းပြီး ဒေသခံ အလုပ်သမား ခုံသမာဓိ ကော်မရှင်ထံ ဆုံးဖြတ်ချက် တောင်းခံမည်ဖြစ်ကြောင်း ထုတ်ပြန်ချက်တွင် ဆိုသည်။ နှစ်ဖက်သည် လုပ်ဆောင်ချက်အခြေပြု ဆုပေးငွေ (performance-based bonuses) အပေါ် ကန့်သတ်ချက်ကို ဖယ်ရှားရေး အဆိုပြုချက်နှင့် ပတ်သက်၍ သဘောတူညီမှု မရရှိခဲ့ကြောင်းလည်း ၎င်းက ပြောသည်။
SVUU နှင့် National Samsung Electronics Union (NSEU) အပါအဝင် အလုပ်သမား သမဂ္ဂ ၃ ခုသည် အင်္ဂါနေ့တွင် လုပ်ခလစာ ညှိနှိုင်းမှုများကို ပြန်လည်စတင်ခဲ့သော်လည်း သဘောတူညီမှု မရရှိသေးပေ။ သမဂ္ဂဝင် ဝန်ထမ်းများက လုပ်ဆောင်ချက်အခြေပြု ဆုပေးငွေ ကန့်သတ်ချက်ကို ဖယ်ရှားပေးရန်၊ လစာ ၇ ရာခိုင်နှုန်း တိုးမြှင့်ပေးရန်နှင့် ဆုပေးငွေ တွက်ချက်ပုံကို ပိုမိုပွင့်လင်းမြင်သာစေရန် တောင်းဆိုနေကြသည်။
ပြီးခဲ့သည့် သီတင်းပတ်အတွင်း သမဂ္ဂများက မေလအတွင်း သပိတ်မှောက်ရန် မဲခွဲဆုံးဖြတ်ရာ၌ အဖွဲ့ဝင် ၉၃.၁ ရာခိုင်နှုန်းက ထောက်ခံမဲပေးခဲ့ကြောင်း ပြောကြားခဲ့သည်။ အဆိုပါ သမဂ္ဂ ၃ ခုတွင် အဖွဲ့ဝင်ဦးရေ စုစုပေါင်း ၉၀,၀၀၀ ခန့် ရှိသည်။