ဂျပန်ကုမ္ပဏီ ပူးတွဲပိုင်ဆိုင်သည့် LNG တင်သင်္ဘောတစ်စင်းအပါအဝင် ရေနံတင်သင်္ဘော ၃ စင်းသည် ကြာသပတေးနေ့က အိုမန်နိုင်ငံ ကမ်းရိုးတန်းအနီးမှ အနီးကပ်ဖြတ်သန်းကာ ဟော်မုဇ်ရေလက်ကြားကို ကျော်ဖြတ်ခဲ့သည်။ အရှေ့အလယ်ပိုင်းစစ်ပွဲကြောင့် အရေးပါသည့် ဤရေလမ်းကြောင်းတွင် သင်္ဘောသွားလာမှု ကျဆင်းနေချိန်၌ ယင်းဖြစ်စဉ်မှာ ရှားပါးသည့်ကိစ္စတစ်ရပ် ဖြစ်သည်။
လန်ဒန်အခြေစိုက် သတင်းအရ မတ်လ ၁ ရက်နောက်ပိုင်း ဟော်မုဇ်ရေလက်ကြားတစ်လျှောက် သင်္ဘောခရီးစဉ်များသည် အီရန်က ခွင့်ပြုထားသည်ဟုဆိုသော အီရန်ရေပြင်အတွင်းရှိ Larak ကျွန်းအနီး လမ်းကြောင်းကိုသာ အများအားဖြင့် အသုံးပြုခဲ့ကြပြီး၊ Lloyd’s List က ယင်းလမ်းကြောင်းကို “Tehran Toll Booth” ဟု ခေါ်ဆိုထားသည်။ ကြာသပတေးနေ့က ဖြတ်သန်းခဲ့သည့် သင်္ဘော ၃ စင်းမှာမူ ရေလက်ကြား၏ တောင်ဘက် အိုမန်နိုင်ငံ Musandam ကျွန်းဆွယ်အနီးမှ ဖြတ်သန်းသွားလာခဲ့ကြောင်း သင်္ဘောသွားလာမှုဒေတာများက ဖော်ပြသည်။
Kpler ၏ ဒေတာအရ ကြာသပတေးနေ့ မနက်ပိုင်းတွင် ဟော်မုဇ်ရေလက်ကြားကို ဖြတ်သန်းခဲ့သည့် သင်္ဘော ၃ စင်းမှာ Habrut နှင့် Dhalkut ဟု အမည်ရသည့် ရေနံကြီးတင် VLCC နှစ်စင်းနှင့် လွတ်နေသည့် LNG တင်သင်္ဘော Sohar LNG တို့ ဖြစ်သည်။ သုံးစင်းလုံးသည် transponder မှ ပေးပို့သည့် သတင်းစကားတွင် “OMANI SHIP” ဟု ဖော်ပြခဲ့ကြသည်။ Sohar LNG သည် မတ်လ ၁ ရက်နောက်ပိုင်း ဟော်မုဇ်ရေလက်ကြားကို ဖြတ်သန်းခဲ့သည့် ပထမဆုံး LNG သင်္ဘောဖြစ်ပြီး၊ ဂျပန်သင်္ဘောကုမ္ပဏီ Mitsui O.S.K. နှင့် ပူးတွဲပိုင်ဆိုင်ကြောင်း ဂျပန်မီဒီယာများက ကုမ္ပဏီကြေညာချက်ကို ကိုးကား၍ ဖော်ပြထားသည်။
ယင်းသင်္ဘောသည် လွတ်နေသည့်အခြေအနေဖြင့် ကြာသပတေးနေ့တွင် ရေလက်ကြားကို ဖြတ်သန်းခဲ့ပြီး ဖေဖော်ဝါရီ ၂၅ ရက်ကတည်းက ပင်လယ်ကွေ့အတွင်း ရှိနေခဲ့ကြောင်း သိရသည်။ Kpler ၏ အချက်အလက်အရ မတ်လ ၁ ရက်မှစ၍ ကုန်စည်သယ်ယူပို့ဆောင်ရေးသင်္ဘောများသည် စုစုပေါင်း ၂၄၀ ကြိမ် ဖြတ်သန်းခဲ့ရာ ပုံမှန်ကာလနှင့် နှိုင်းယှဉ်လျှင် ၉၄ ရာခိုင်နှုန်း လျော့နည်းသွားသည်။ ထိုအထဲမှ ၁၅၁ စင်းမှာ ရေနံတင်နှင့် ဓာတ်ငွေ့တင်သင်္ဘောများဖြစ်ပြီး အများစုမှာ ရေလက်ကြားအပြင်ဘက်သို့ အရှေ့ဘက်သွားနေကြကြောင်း သိရသည်။
AFP ၏ ဆန်းစစ်ချက်အရ ကြာသပတေးနေ့ အစောပိုင်းတွင် ပြင်သစ်ပိုင် ကွန်တိန်နာသင်္ဘောတစ်စင်းလည်း ဟော်မုဇ်ရေလက်ကြားကို ဖြတ်သန်းခဲ့ပြီး၊ ယင်းမှာ မတ်လ ၁ ရက်နောက်ပိုင်း ဥရောပအဓိက သင်္ဘောကုမ္ပဏီတစ်ခုက ပထမဆုံး သိရှိထားသည့် ဖြတ်သန်းမှု ဖြစ်သည်။ တစ်ဖက်တွင် အီရန်ကမူ အိုမန်နှင့် ပူးပေါင်း၍ ဟော်မုဇ်ရေလက်ကြားအတွင်း ပင်လယ်သွားလာမှုကို ငြိမ်းချမ်းရေးကာလအတွက် ကြီးကြပ်မည့် လုပ်ထုံးလုပ်နည်းတစ်ရပ်ကို ရေးဆွဲနေကြောင်း ကြာသပတေးနေ့က ပြောကြားခဲ့သည်။ ဒုတိယနိုင်ငံခြားရေးဝန်ကြီး Kazem Gharibabadi က Sputnik သတင်းဌာနသို့ ပြောရာတွင် အမေရိကန်နှင့် အစ္စရေးနှင့် ဖြစ်ပွားနေသည့် စစ်ပွဲပြီးဆုံးပြီးနောက် ယင်းလုပ်ထုံးလုပ်နည်းကို အသက်ဝင်မည်ဖြစ်ပြီး သင်္ဘောလှုပ်ရှားမှုများကို စီမံခန့်ခွဲရန် အခြေခံစည်းမျဉ်းများ သတ်မှတ်မည်ဟု IRNA သတင်းဌာနက ဖော်ပြသည်။