တရုတ်လျှပ်စစ်ကားကုမ္ပဏီ BYD Korea က MBN ရုပ်သံမှ ထုတ်လွှင့်သည့် ကိုရီးယားနိုင်ငံ၏ ပထမဆုံး မုန့်ဖုတ်ပြိုင်ပွဲအစီအစဉ် “Cheonha Bakery: Bake Your Dream” ၏ အနိုင်ရသူ Hwang Ji-o ကို ဆုယာဉ်အဖြစ် BYD Sealion 7 လက်ဆောင်ပေးအပ်ခဲ့ကြောင်း ဧပြီ ၆ ရက်တွင် ကြေညာခဲ့သည်။
ယင်းယာဉ်ပေးအပ်ပွဲကို ဆိုးလ်မြို့တောင်ပိုင်းရှိ BYD Auto showroom တွင် ကျင်းပခဲ့ပြီး Hwang Ji-o နှင့် BYD Korea ၏ ခရီးသည်ကားဌာနအကြီးအကဲ Cho In-chul တို့ တက်ရောက်ခဲ့ကြသည်။ BYD Korea က brand partner အဖြစ် ပါဝင်ခဲ့သည့် “Cheonha Bakery” အစီအစဉ်သည် နိုင်ငံအတွင်း အကောင်းဆုံး မုန့်ဖုတ်သမားကို ရွေးချယ်ယှဉ်ပြိုင်သည့် အစီအစဉ်ဖြစ်ပြီး လက်မှုမုန့်ဖုတ်သမားများ ကြုံတွေ့ရသည့် အခက်အခဲများနှင့် ၎င်းတို့၏ ကိုယ်ရေးအတွေ့အကြုံများကိုလည်း ရိုက်ကူးတင်ဆက်ထားသည်။ တနင်္ဂနွေနေ့ ထုတ်လွှင့်ခဲ့သည့် နောက်ဆုံးအပိုင်းတွင် Hwang Ji-o သည် နည်းပညာကျွမ်းကျင်မှုနှင့် ဖန်တီးတီထွင်မှုရှိသော ချက်နည်းများကြောင့် ဒိုင်အဖွဲ့ထံမှ အမှတ်အများဆုံး ရရှိခဲ့သည်။
BYD Sealion 7 သည် စွမ်းဆောင်ရည်၊ လုံခြုံရေးနှင့် အတွင်းပိုင်းကျယ်ဝန်းမှုကို ဦးစားပေးထားသည့် ပရီမီယံ လျှပ်စစ် SUV မော်ဒယ်ဖြစ်ကြောင်း BYD က ဆိုသည်။ Cho In-chul က အဆိုပါအစီအစဉ်သည် BYD ၏ အမှတ်တံဆိပ်ပုံရိပ်နှင့် ကိုက်ညီကြောင်း ပြောကြားပြီး “Cheonha Bakery” သည် မုန့်ဖုတ်တတ်သူကိုသာ ရှာဖွေသည့် အစီအစဉ်မဟုတ်ဘဲ ပြိုင်ပွဲဝင်တစ်ဦးစီက မိမိတို့၏ အိပ်မက်ကို ကိုယ်တိုင် ‘ဖုတ်ထု’ နေသည့် လုပ်ငန်းစဉ်တစ်ခုဖြစ်ကြောင်း မှတ်ချက်ပြုခဲ့သည်။ Hwang Ji-o ကလည်း ယာဉ်ကို ပထမဆုံး မြင်တွေ့ချိန်တွင် ဒီဇိုင်းသပ်ရပ်မှုနှင့် ထင်ရှားသည့် ပုံရိပ်ကြောင့် စိတ်ဝင်စားသွားခဲ့ပြီး လျှပ်စစ်ကားများ၏ ချောမွေ့သည့် မောင်းနှင်မှုအတွေ့အကြုံမှာလည်း အထင်ကြီးစရာကောင်းခဲ့ကြောင်း ပြောကြားခဲ့သည်။ BYD Korea က ဤ brand partnership နှင့် ဆုယာဉ်ထောက်ပံ့မှုများကို နေ့စဉ်ဘဝအတွင်း သဘာဝကျကျ ခံစားရနိုင်သည့် lifestyle partner အဖြစ် BYD လျှပ်စစ်ကားများကို တင်စားဖော်ပြရန် ရည်ရွယ်ထားပြီး ကိုရီးယားစားသုံးသူများအကြား အမှတ်တံဆိပ်ရပ်တည်မှုကို ထပ်မံတိုးချဲ့သွားမည်ဟု ဆိုသည်။