ဒေဂျွန်းမြို့အခြေစိုက် Anjun Industrial ၏ စက်ရုံမီးလောင်မှုကြောင့် လူ ၁၄ ဦး သေဆုံးပြီး ၆၀ ဦး ဒဏ်ရာရရှိခဲ့သည့် အမှုနှင့်ပတ်သက်၍ ကုမ္ပဏီအမှုဆောင်အရာရှိ ၆ ဦးကို ရဲတပ်ဖွဲ့က နိုင်ငံထွက်ခွာခွင့် ပိတ်ပင်လိုက်သည်။
ဒေဂျွန်းမြို့တော်ရဲတပ်ဖွဲ့က ကုမ္ပဏီတာဝန်ရှိသူ ၅၃ ဦးကို စစ်ဆေးမေးမြန်းထားပြီး ကုမ္ပဏီ၏ ကွန်ပျူတာများနှင့် ကိုယ်ပိုင်မိုဘိုင်းဖုန်းများအပါအဝင် သိမ်းဆည်းရမိထားသည့် ပစ္စည်း ၂၅၆ ခုကို ဒစ်ဂျစ်တယ်ဖော်ရင်စစ် စစ်ဆေးမှု ပြုလုပ်နေကြောင်း ကြာသပတေးနေ့တွင် ပြောကြားခဲ့သည်။ ယင်းစုံစမ်းစစ်ဆေးမှု၏ ရည်ရွယ်ချက်မှာ မီးလောင်မှု မည်သို့စတင်ဖြစ်ပွားခဲ့သည်နှင့် အဘယ်ကြောင့် အလုပ်သမားအများအပြား သေဆုံးဒဏ်ရာရခဲ့ရသည်ဆိုသည်ကို ဖော်ထုတ်ရန်ဖြစ်သည်။
နိုင်ငံထွက်ခွာခွင့် ပိတ်ပင်ခံရသူများတွင် အမှုဆောင်အရာရှိချုပ် ဆွန် ဂျူဟွမ် (Son Ju-hwan) အပါအဝင် အမှုဆောင် ၆ ဦး ပါဝင်သည်။ မီးလောင်မှုသည် ပြီးခဲ့သည့် သောကြာနေ့က ဆိုးလ်မြို့တောင်ဘက် ခန့်မှန်းအားဖြင့် ၁၄၀ ကီလိုမီတာအကွာ ဒေဂျွန်းမြို့ Munpyeong-dong ခရိုင်ရှိ စက်ရုံတွင် ဖြစ်ပွားခဲ့ပြီး အလုပ်သမား ၁၄ ဦး အသက်ဆုံးရှုံးခဲ့သည်။
စစ်ဆေးမေးမြန်းခံထားရသူ ၅၃ ဦး၏ ထွက်ဆိုချက်များအရ မီးအချက်ပေးသံ စတင်မြည်ပြီးနောက် ချက်ချင်းရပ်သွားသဖြင့် အလုပ်သမားများက စနစ်ချွတ်ယွင်းမှုဟု ထင်မှတ်ကာ ထွက်ပြေးရှောင်လွှဲမှု နှောင့်နှေးခဲ့နိုင်ကြောင်း ရဲတပ်ဖွဲ့က သံသယရှိနေသည်။ “မီးစတင်လောင်ကျွမ်းမှုနဲ့ မီးလျှံတွေ လျင်မြန်စွာ ပြန့်ပွားသွားတာဟာ အရေးကြီးသလို၊ အချိန်မီ ထွက်ပြေးမလွတ်မြောက်နိုင်ခဲ့တာကြောင့် လူအများအပြား သေဆုံးဒဏ်ရာရခဲ့ရတဲ့အချက်ကလည်း ထပ်တူအရေးကြီးပါတယ်” ဟု ရဲစုံစမ်းရေးမှူးတစ်ဦးက မီဒီယာရှင်းလင်းပွဲတွင် ပြောကြားခဲ့သည်။
မီးအချက်ပေးသံ အဘယ်ကြောင့် ရပ်သွားခဲ့သည်၊ မည်သူက ပိတ်ခဲ့သည်၊ စနစ်ပိုင်းဆိုင်ရာ ချို့ယွင်းချက် ရှိမရှိတို့ကိုလည်း ဆက်လက် စုံစမ်းသွားမည်ဟု ရဲတပ်ဖွဲ့က ပြောကြားထားသည်။